Su naschidorgiu (de Nanni Falcoi)

Chi deo m’ammente in domo de babbu, de sas Pascas, de Nadale o de Abrile chi esserent stadas, non si nd’afestaiat mai. Mamma, est beru, faghiat sa pertusita, ma non semper fiamus in domo pro chi babbu nos l’aeret segada in conca in antis de nos la mandigare, comintzende dae su prus mannu e acabbènde∙la cun su prus minore. Non m’ammento mancu prus sa formula augurale chi issu nos naraiat, ma chi mi si trobogiaiat sa limba che unu limbitònchinu rispondende, giai mi nd’ammento.

Pro sos pastores, sa pasca de Nadale falat in dies de incungia. Sas dies in antis si scannat, e s’incomintzat a murgher. Si seberat su madrigadu stelladu dae cussu angiadu, e àteras fainas de pastores chi no interessant a neunu. Su manigiu cun sa robba est totu de sistemare. Sas oras passant lestras e su mesudie nos agataiat galu in fainare. Non b’aiat ora pro pigare a bidda.

Pro su prus, su note in antis, passadu in cumpanzia in spuntinos de angione, binu, càntigos e murras fintzas a s’arrughire, su mangianu mi grangeaiat unu dolore de conca e unu bullugiamentu de matza chi nen mancu s’aera ghelada mi sanaiat. E sos ogros pariat chi ti nde cheriant brincare dae sas calancas dae su brujore de su fumu de s’arrustu.

Ma su naschidorgiu fiat afestadu. Sa missa de puddu chi aiamus ascurtadu, fiat cussa de sas carreras afaca a sa cresia, si capitaiat de spuntinare in bidda. Mai andadu in bida mia a una missa de puddu. Nen mancu a mannu. Ma giai m’at a perdonare. E si non chi bidat issu. Deo su naschidorgiu afestadu l’apo.