Limba e famine (de Nanni Falconi)

Non si podet schire, abbaidende∙la oe, si Maria Isabella Piga, laureada in matemàtica e chi nanchi no ischit nudda de sardu, at a esser una diretritze bona de su servìtziu regionale pro sa limba sarda. A bias, medas bias, sos stùdios nostros non contant nudda cando andamus a sboligare tzertas fainas. Bisongiat de bider si est capatze de si chircare bonos consigeris, si est su bastante inteligente de cumprender chi no nd’ischit nudda e chi depet imparare in presse. Si faghet lestru a imparare, si cherimus imparare.

Su chi nd’essit a campu dae custa nòmina, est chi in su guvernu regionale non b’at neunu chi siat cumpetente in contu a limba sarda; ma custu giai si schiat dae in antis de andare a votare. A sos prus de sos sardos cando andant a su votu no interessat sa polìtica linguistica chi sos candidados ant a fagher, e custu est su resurtadu. Sa neghe est de chie los votat. Non nos nde depimus spantare si semus guvernados dae persones chi non bident unu problema limba in Sardigna, no la bidet mancu chie los votat. Gasi comente non nos depimus spantare meda de sa carrera chi ant imbucadu, chi est cussa de torrare a nudda cussu pagu chi si fiat comintzadu a programmare e fagher. Sas paràulas e sas promissas de s’assessore sunt bonas cando narat apo a fagher custu e fagher cuddu, ma si non sunt acumpangiadas dae su soddu pro l’as averare sunt fàulas, non s’ant a averare mai. Parimus gioghende a ballinas. Ma su giogu est prus de importu de nche scodulare una laddera in su garitzi.

“Amus àteru ite pensare in custos tempos de crisi mala, àteru che limba est.” Mi paret de l’aer semper intesa. Semus semper in crisi sos sardos. Novidade est! L’apo intesa dae cando apo comintzadu a cumprender, e non sunt pagos sos annos chi apo. Comente e chi renuntziende a fagher una polìtica linguìstica comente si tocat, risparmiende cussas pagas pibinidas rutas dae sa mesa de sos sardos, resessemus a ponner a postu sos problemas econòmicos!

Ma bazi…

Esseret bastadu cussu bi fia stadu fintzas deo; si benimus ricos in italianu mai in sa bida si bidat sa limba sarda. Ma no est gasi; perdimus sa limba e nos  mantenimus su fàmine.