La Befana (di Cosimo Filigheddu)

-Toru’, e abà devi drummì parò.
-Oh ba’, si è chizzu ancora! E dassami abbaidà “Il trono di spade” a lu computer.
-No, Torù. Oggi no è chizzu.
-E parchì oggi no è chizzu e l’althri dì era chizzu?
-Parchì oggi è la notti di Li Tre Re e si sei iscidadu la Befana s’assustha parchì vedi la luzi azzesa e si n’anda cu tutti li rigari.
-Puru cu Nintendo?
-Puru cu chissu.
– Puru cu la dibisa noba di lu basket?
-Puru cu chissa.
-Oh ba’, e si inveci di la Befana torra mamma e agatta la luzi isthudata e cridi chi no v’è nisciunu e si n’anda?
-Torù, ti l’aggiu dittu chi mamma no torra.
-Siguru sei, ba’?
-Emmu, Torù. No entra più mamma in chistha casa.
-Ma edda m’avia dittu chi…
-Mudu!
-Ba’…
-Torra vi sei!
-Cumenti è la Befana?
-Veccia e fea chi la fami.
-No è bedda cumenti mamma?
-Tanca l’occi, Torù.
-Emmu, ba’.
Tum, tum, tum.
-E ca è?
-Mi manda signora Ester pa chissu siviziu …
-Già aggiu cumpresu. Entria.
-E dimmi di tu. Pa chissu chi dubimmu fa… bisogna chi intremmu i cunfidenzia.
-E abanza di tu. Lagati abbaidà… già sei bedda. Una bedda mascitta… mancarri un poggu troppu giobana pai me…
-No sei vecciu!
-No? Me muglieri no era di chistha opinioni.
-Parchì, cosa t’ha dittu?
-Nudda, si z’è parthuda cu unu e adiossu!
-Mi dipiazi. E t’ha lagaddu a la sora?
-No, cu lu pizzinnu.
-E chisthu pizzinnu…
-Sei giunta inoghi pa’ rasgiunà o pa’ ibiudammi la cugliupa?
-L’ulthima c’hai dittu.
-E tandu priparadi. Li dinà li voi primma o daboi?
-Puru daboi. Possu intrà i lu comodu?
-Inchibi è, fa’ in pressa.
-Emmu.
-E poni attinzioni a no iscidà la pizzinnu chi la cammara soia è affacc’appari.
-Toruccio?
-E ca ti l’a dittu chi si ciamma digussì?
-Tu mi l’hai dittu abarabà.
-Ah, no mi n’era appizaddu. Anda e fa in pressa…
(Cazzu, mi soggu puru immintigaddu di cumparà li rigari a me figlioru. Boh, dumani andemu a Città Mercato e li fozzu sciubarà a eddu).
Tum, tum, tum
-Toru’, Toru’
-Oh! E ca sei?
-La Befana.
-La Befana?
-Emmu, no lu sapì chi oggi è la notti di Li Tre Re.
-Emmu, ma babbu m’abia dittu chi tu eri veccia e fea chi li la fammi e inveci sei pizzinna e bedda.
-Torù, t’augureggiu di no cunniscilla mai la fammi.
-Ma babbu m’abia dittu chi si tu vidì la luzi azzesa…
-Lassa pirdhì, Torù, chi babbu toiu in chisthi dì v’ha umbè di pinsamenti e dizi parauri chi tu no debi intindì e fazi cosi chi tu no debi abbaidà.
-E cosa dobaristhia fa?
-Lu debi agiudà.
-E cumenti fozzu ad agiudallu.
-Lu debi vurì umbè be’.
-E a mamma?
-E puru a edda, ca è passiunendi umbè a lassà un agnireddu cumenti a te.
-Puru edda è passiunendi?
-Emmu, coraredda. Drommi, abà. Zi vidimmu l’annu chi veni.
-Oh, oh. Ma i lu comodu sei faradda? Oh, undì sei?
-Ba’, ba’.
-Torù, iscidadu sei? Mi’ chi la Befana no veni.
-Oh ba’, mi chi è giunta e si n’è andadda.
-Ma cosa sei dizendi? Tanca l’occi, Torù.
-Digussì è, ba’. L’aggiu vistha eu iscendi di lu balchoni ed è azzadda su l’ischoburu ed è vuradda luntanu luntanu.
-E chisthi cosa so’?
-E no li vedi, ba’? Nintendo, la dibisa noba di lu basket… Li me’ rigari.
-E… t’ha dittu cosa?
-Emmu, ba. Chi sei un brab’ommu e chi sei passiunendi e chi eu ti debu agiutà. E mamma puru… Oh ba’, babbu, e abà parchì sei pignendi? Mi chi oggi è festha. E’ la festha di Li Tre Re.